Við Norræna húsið í Reykjavík.

Það má búast við líflegum umræðum þann 2. og 3. september næstkomandi þegar stjórnmálamenn hitta þjóðina á FUNDI FÓLKSINS við Norræna húsið. Slegið verður upp tjaldbúðum þar sem hin ýmsu félagasamtök, stjórnmálaflokkar, stofnanir og fyrirtæki verða með starfsemi og þjóðþekktir einstaklingar stjórna sjóðheitum umræðum. 

Um Fund fólksins má finna upplýsingar á Facebook.

Hátíðin er vettvangur til að virkja lýðræðið og brúa bilið milli stjórnmálamanna og fólksins í landinu. Í bland við líflegar umræður verða síðan tónlistaratriði og ýmsar uppákomur.

„Þetta er búin að vera afar ánægjuleg meðganga“, segir Ingibjörg Gréta Gísladóttir, verkefnastjóri hátíðarinnar. „tvöfalt fleiri þátttakendur taka þátt í hátíðinni í ár miðað við í fyrra en tæplega 80 þátttakendur eru skráðir til leiks með um 100 viðburði og fjölbreytt málefni“.

Fundur Fólksins er að norrænni fyrirmynd en slíkar hátíðir hafa verið haldnar í áratugi á hinum Norðurlöndunum. Upphaf þeirra má rekja til Olofs Palme, fyrrverandi forsætisráðherra Svíþjóðar sem þrátt fyrir að hafa lofað konunni sinni að ræða ekki pólitík í sumarfríinu árið 1967, gat ekki á sér staðið og var kominn uppá vörubílspall áður en hún gat snúið sér við að ræða málin. Í dag eru slíkar hátíðir haldnar árlega á öllum Norðurlöndum og er stærsti vettvangur umræðna um samfélagsmál.

„Hátíðin er einstaklega vel tímasett í ár, upptaktur kosninga og því má búast við fjörlegum umræðum“, útskýrir Ingibjörg Gréta, „við erum búin að vera í nánu samtali við alla stjórnmálaflokka, alþingismenn og forseta þingsins til að vinna að því að dagskrá þingsins skarist ekki á við FUND FÓLKSINS. Það er afar áríðandi að lýðræðis- og stjórnmálahátíð sem þessi sé vel sótt af stjórnmálamönnum og því allt kapp lagt á að slíkt verði“.

Dagskrána segir hún afar fjölbreytta, þannig verði á 30 mínútna fresti samtal við stjórnmálamann í stjórnmálabúðum hátíðarinnar. Í hinum tjöldum hátíðarinnar verði pallborðsumræður, kynningar, speed-date stjórnmálanna, pub-quiz, matreiðsla, sýnikennsla og spurningakeppni í bland við tónlistaratriði og aðrar uppákomur.

„Þetta er hátíð fyrst og fremst, sem stuðlar að því að efla lýðræðið í landinu með heiðarlegum umræðum um þau samfélagsmál sem brenna á þátttakendum og þá um leið þjóðinni“, útskýrir Ingibjörg Gréta. „Í hvernig samfélagi viljum við búa? Hvar viljum við forgangsraða? Hvernig viljum við leysa málin? Hvaða leiðir eru færar til velsældar og hvernig vinnum við að þeim? Þessum spurningum og fleirum verður svarað á hátíðinni og ég get lofað að það finna allir áhugaverð málefni og það besta er að allir geta haft áhrif á umræðuna“, segir Ingibjörg að lokum.

Sú nýlunda er í ár að ágrip af öllum umræðum verða gefin út eftir hátíðina svo þingmenn, fjölmiðlar og aðrir áhugasamir um samfélagsmál geti áttað sig á hvaða málefni vor rædd á hátíðinni. Einnig verður prentuðum útgáfum skilað inn á Þjóðarbókhlöðu til varðveislu svo sagnfræðingar framtíðarinnar og aðrir áhugasemir geti skoðað hvaða samfélagsmál brunnu á þjóðinni haustið 2016.

Engin hagsmunasamtök innlend eða erlend standa að hátíðinni. Norræna húsið stóð að baki fyrstu hátíðinni í fyrra, 2015 en í ár er það Almannaheill – samtök þriðja geirans sem er framkvæmdaaðili hátíðarinnar með stuðningi Velferðarráðuneytisins, Reykjavíkurborgar og Norræna hússins.


Af www.kvennabladid.