Frétt dagsins: -Berjasérfræðingar segja nú að allt geti skeð!
Berjasérfræðingar okkar segja að það sé vel hugsanlegt að eitthvað verði hægt að tína af berjum í haust. Menn voru nú eiginlega orðnir úrkula vonar í því máli. Við nefnum engin nöfn, en hinir sérfróðu sem hafa verið á útkikki fyrir okkur, segja að tíðarfarið undanfarna daga hafi verið hagstætt. Það verði örugglega talsvert af krækiberjum, bláber verði nokkur og jafnvel verði hægt að fá aðalbláber á vissum leynistöðum. Þeir staðir verða náttúrlega ekkert gefnir upp!
Ef fer sem horfir og ekki gerir næturfrost fyrir mánaðamót munu margir taka gleði sína á nýjan leik. Er gott til þess að vita, því ýmsir voru orðnir vondaufir með að komast á aðalbláberjamó.
Eins og kunnugt er kalla Vestfirðingar ekki allt ömmu sína og ber kalla þeir ekki nema aðalbláber!
Hallgrímur Sveinsson.
