Framvinda Dýrafjarðarganga
Hér er samantekt af því helsta sem gerðist í vikum 33-34 við vinnu Dýrafjarðarganga.
Byrjað var á að leggja frárennslis- dren- og ídráttarlagnir ásamt brunnum í hægri vegöxl frá gegnumbroti og að munna í Dýrafirði ásamt niðursetningu á drenlögn í vinstri vegöxl og tengibrunnum fyrir rafmagn.
Haldið var áfram vinnu við vatnsvarnir í göngunum. Búið er að koma fyrir um 19.000 boltafestingum og setja upp um 10.000 m2 af einangrunarklæðingu. Byrjað verður að sprautusteypa yfir klæðingarnar í vikunni.
Búið er að flytja allan búnað fyrir steypuvinnu á vegskála yfir í Arnarfjörð og setja saman krana og annan búnað. Verið er að undirbúa fyrir fyrstu steypufæru í yfirbygginu ásamt því sem haldið hefur verið áfram með að steypa sökkla undir vegskálann.
Í Dýrafirði var byrjað að leggja burðarlag á kaflanum næst endanum þar sem vegurinn tengist núverandi vegi. Sem fyrr var efnisvinnsla í fullum gangi í Arnarfirði og er verið að framleiða efni sem fer í veginn í göngunum.
Búið er að rífa mót frá brúargólfinu á brúnni yfir Mjólká og byrjað að moka efni undan henni. Vinna við brúargólfið á brúnni yfir Hófsá er hafin.
Á meðfylgjandi myndum má sjá brúna yfir Mjólká, undirstöður fyrir brúargólf í Hófsá, vinnu við sökkla í vegskálanum í Arnarfirði og útlagningu á burðalagi í Dýrafirði.
Fyrir hönd framkvæmdaeftirlits Dýrafjarðarganga
Baldvin Jónbjarnarson
