Á myndinni er Dýrfirðingurinn Bjarni GUðmundsson að spjalla við gesti á Ólafsdalshátíð fyrir nokkrum árum.

Fergusonfélagið og Landbúnaðarsafn Íslands boða til fundar um ofangreint efni í félagsheimilinu Vogalandi í Króksfjarðarnesi kl. 20.30 á þriðjudagskvöldið, 12. mars. Sigurður Skarphéðinsson formaður Fergusonfélagsins kynnir þetta merka félag og Bjarni Guðmundsson, verkefnisstjóri hjá Landbúnaðarsafni Íslands og kennari á Hvanneyri, fjallar um efnið í máli og myndum.

„Ræktunarframfarir og nýja verkmenningu í sveitunum má í mörgu rekja til Torfa Bjarnasonar í Ólafsdal,“ segir í fundarboði. „Svo komu dráttarvélarnar af ýmsum gerðum, sem ásamt landbúnaðarjeppanum breyttu störfum og mannlífi til sveita enn frekar og urðu eftirsóttar menningarminjar og hluti þjóðarsögunnar.“

Dr. Bjarni Guðmundsson, Dýrfirðingur á Hvanneyri, hefur skrifað bækur um þær tegundir dráttarvéla sem algengastar voru í landbúnaði hérlendis um og upp úr miðri síðustu öld. Það eru bækurnar „... og svo kom Ferguson“ og „Alltaf er Farmall fremstur“. Bjarni áritar þessar bækur í fundarlok, óski fundarmenn þess, hvort heldur þeir koma með þær eða kaupa á staðnum.

Allt áhugafólk um gamlar dráttarvélar og þátt þeirra í sögu sveitanna er velkomið.

Af: www.reykholar.is