Víkingahátíðin Dýrafjarðadagar heppnaðist vel er hún var haldin í sjöunda sinn um helgina. „Hátíðin gekk vonum framar og það seldust yfir 700 miðar og þá eru ótalin öll leikskólabörnin og þeir sem kíktu bara stutta stund. Það var bara æðislega gaman og allt var til fyrirmyndar", segir Daðey Arnborg Sigþórsdóttir, einn skipuleggjanda hátíðarinnar. Setning hátíðarinnar fór fram í Knapaskjóli, nýrri reiðskemmu hestamanna á Söndum á föstudag en hápunktur hennar var án efa sjósetning nýsmíðaðs víkingaskips. „Skipið var sjósett á föstudagskvöld við mikinn fögnuð viðstaddra og við þetta tilefni var því gefið nafnið Vésteinn", segir Daðey Arnborg.

Frá árinu 2002 hafa Dýrfirðingar blásið til þriggja daga hátíðar hvert sumar með því að bjóða uppá fjölbreytta afþreyingu. Á dagskránni í ár var meðal annars að finna stigamót í strandblaki, tónleika, leiksýningar á vegum Act alone og hina ómissandi markaðsstemmningu og grillveislu á víkingasvæðinu á Þingeyrarodda.

 

Dýrafjarðardagar sem voru endurvaktir fyrir sex árum eftir nokkurra ára hlé hafa rækilega komið sér á kortið og þá ekki síst hjá brottfluttum Dýrfirðingum sem jafnan sækja hátíðina.