Ferðablaðið Vestfirðir komið á flug
Enn á ný kemur Vestfirðir út, veglegt ferðablað um okkar fallega Vestfjarðarkjálka. Í blaðinu kennir að venju ýmissa grasa og textinn ýmist á íslensku, ensku eða þýsku. Kort yfir kirkjur á Vestfjörðum og myndir af nokkrum þeirra, sögur af uppáhaldsstöðum og ýtarlegt viðtal við Stellu í Heydal, drottningu Djúpsins. Í blaðinu má líka lesa um Ingjaldssand, um villta mey og fyrsta vestfirska ferðaþjónustufyrirtækið til að fá Vakann. Ferðafélag Ísfirðinga birtir kort og dagskrá sumarsins og Koltra kynnir sig.
Ritstjóri blaðsins er að þessu sinni Bryndís Sigurðardóttir og í ritstjórnarpistli sínum segir hún:
„ Vestfjarðarkjálkinn er einstakur, náttúran er magnþrungin, ógnandi á köflum en alltaf falleg og hrífandi. Að aka Djúpið í kvöldlogninu, horfa á fjöllin speglast í sjónum, fylgjast með fuglum, selum og jafnvel hvölum, vara sig á blessuðu lambakjetinu sem spígsporar á þjóðveginum og undrast fámennið er mannbætandi upplifun. Að kúldrast í koti sínu meðan vetrarhríðin lemur á gluggum, rafmagnið flöktandi og ekki sér milli húsa, jafnvel svo dögum skiptir, það er þá sem náttúran sýnir afl sitt og yfirburði en í blíðviðrinu og björtu litunum birtist mildi hennar. Fjallahringir og djúpir firðir, fossar og grösugar brekkur og kraftmikið mannlíf eru einkenni Vestfjarða, þar er gott að vera.“
Blaðinu hefur verið dreift á helstu ferðamannastöðum.
Sjá blaðið á þessari slóð:
http://www.bb.is/lisalib/getfile.aspx?itemid=107884
