Erfiðleikar eru áskorun
Sigmundur F. Þórðarson, formaður Íþróttafélagsins Höfrungs á Þingeyri fékk hvatningarverðlaun Ísafjarðarbæjar á sunnudag fyrir vel unnin félagsstörf með Höfrungi og öðrum félögum. Í rökstuðningi fyrir útnefningunni segir að Sigmundur hafi verið potturinn og pannan í starfi Höfrungs í ríflega fjóra áratugi. Eitt af einkennum hans sé jafnframt hversu auðvelt hann á með að hrífa fólk og fá það með sér í lið. Sigmundur hefur lagt mikla áherslu á íþróttastarf fyrir börn í Dýrafirði og fengið þangað menntaða þjálfara í öll störf.
Höfrungur er ekki einungis íþróttafélag heldur kemur félagið að ýmsum menningar- og félagsstörfum á Þingeyri og oftar en ekki stendur Sigmundur þar að baki, hvort sem um er að ræða uppsetningu á leikritum, þrettándagleði eða hverju sem er. Sigmundur sagðist hafa verið orðlaus þegar hann fékk viðurkenninguna. „Það er ekkert slor að fá hvatningarverðlaunin,“ segir Sigmundur í samtali við blaðið.
„Á meðan mér er treyst held ég áfram og ég er í skýjunum yfir þessum heiðri. Mér er efst í huga þakklæti til alls þessa góða fólks sem ég hef starfað með því ég á þetta ekki einn, fjarri því, ég deili þessu með öllum þeim sem ég hef starfað með mér í gegnum súrt og sætt. Þetta hefur ekki alltaf verið dans á rósum og jafnvel þó okkur fækki í samfélaginu stöndum við þétt saman og gerum bara eitthvað skemmtilegt saman. Ég vil vinna með öllum, hvort sem er á Flateyri, Suðureyri eða annars staðar og rífa íþróttastarfið upp. Það er ómetanlegt að eiga svona marga vini á öllum þessum stöðum. Ég hef svo gaman af lífinu og þó það séu einhverjir erfiðleikar þá er það bara áskorun, lífið er svo skemmtilegt,“ segir þessi lífsglaði maður sem vinnur nú að uppsetningu á leikritinu Galdrakarlinn í Oz með Íþróttafélaginu Höfrungi.
Texti með mynd nr. 2
Á Héraðsmóti að Núpi í Dýrafirði fyrir allmörgum árum.
F.v.: Gunnar Pálsson, frá Stefni á Suðureyri, Strandamaðurinn sterki, Hreinn Halldórsson, stangastökkvarinn Sigurður Sigurðsson úr Reykjavík og Emil R. Hjartarson, frá Gretti á Flateyri. Að baki Emils er Sigmundur Þórðarson frá Höfrungi á Þingeyri. Ungu drengina er skrásetjari ekki alveg klár á.
