Eldiskví í eigu fyrirtækisins Dýrfisks liggur nú við höfnina á Þingeyri. Í kvínni eru um 14-15 þúsund regnbogasilungaseiði en von er á 32 þúsundum til viðbótar í dag. Kvíin verður líklegast dregin í Haukadalsbótina á miðvikudagsmorgun þar sem hún mun liggja í vetur en stefnan er að slátra fiskinum seinni parts næsta sumars. Að sögn Brynjars Gunnarssonar, sem hefur umsjón með kvínni, hefur ekki verið tekin ákvörðun um hvar fiskurinn verður unnin eða á hvaða markað hann fer - væntanlega þó þangað sem mest fæst fyrir hann.

Silungarnir eru núna um 250 gr. að þyngd en Brynjar segist vonast til að þeir nái um 2,5 kg. þyngd. Þeim er gefið kögglafóður tvisvar á dag þar sem uppistaðan er mest megnis loðnumjöl og vítamín.