Einn góður frá Ísafirði: - Veðurtepptir þingmenn
Eitt sinn varð hópur þingmanna veðurtepptur á Hótel Ísafirði. Notuðu menn tímann til að gleðjast og efla félagsandann fram eftir nóttu.
Þegar leið á nóttina kom náttúran yfir framsóknarmennina og þeir spurðu félaga sína í hópnum, hvort það væru ekki neinar konur á þessu hóteli sem mætti ræða við pólitík. Matthías Bjarnason, sem þar var staddur, kvaðst ekki vita til þess að neinar konur væru á hótelinu sem hefðu áhuga á stefnu Framsóknarflokksins nema kannski þingmaður Kvennalistans, Anna Ólafsdóttir Björnsson, sem þar dveldi líka.
Ekki töldu Framsóknarmenn það árennilegan kost og supu nú áfram enn um stund með félögum sínum. Undir morgun stóð annar þeirra loksins upp, hristi sig allan í framan, girti belti sitt og spurði með glímuskjálfta í röddinni:
Á hvaða herbergi er Anna?
(Vestfirskir stjórnmálamenn í blíðu og stríðu)
