30.06.2016 - 06:27 | Vestfirska forlagið,Dýrafjarðardagar,bb.is
Dýrafjarðardagar um helgina - (á helginni)
Frá liðnum Dýrafjarðardögum. Grillveislan á Víkingasvæðinu er vinsæl.
Börnin geta farið í hoppikastala, farið á hestbak og fengið andlitsmálningu og á laugardeginum keppt í dorgveiðikeppni. Fjölskyldan getur átt góðar samverustundir við að skoða sölumarkaðinn sem verður í salnum við hlið Hljóðfærasafnsins, farið á sirkussýningu í íþróttahúsinu, tekið þátt í fjölskylduratleik og hinni árlegu grillveislu á Víkingasvæðinu, að ógleymdri hádegis-súpu á laugardeginum, en í ár eru það sælkerar Brekkugötunnar sem spreyta sig. Hinir fullorðnu geta svo skellt sér á ball í Félagsheimilinu á laugardagskvöldið þar sem Valli Diskó sér um að halda uppi fjörinu fram á nótt.
Morgungöngur verða á Sandafell á laugardeginum og Mýrarfell á sunnudeginum, keppt verður í strandblaki, Vilborg Davíðsdóttir verður með fyrirlestra og Raymond Rafn Cartwright verður með myndlistarsýningu í Grunnskólanum.
Nálgast má dagskrá hátíðarinnar í heild sinni inn á Fésbókarsíðu hennar. Aðgangsarmbönd verða til sölu í handverksbúðinni Koltru.
