16.07.2016 - 06:40 | bb.is,Vestfirska forlagið
Dagskrá Hlaupa- og afmælishátíðanna í dag - 16. júlí 2016
Ísafjörður.
Kaupstaðarréttindin fengust 26. janúar 1866, en íbúar sveitarfélagsins kusu sína fyrstu bæjarstjórn þann 16. júlí sama ár.
Dagskráin hefst kl. 10 við Edinborgarhúsið á Ísafirði þar sem Jóna Símonía Bjarnadóttir, sagnfræðingur og forstöðumaður Safnahúss, fer með áhugasama í Sögugöngu um Eyrina.
Þá er komið að hópmyndatöku af fólki í íslenska þjóðbúningnum kl. 12 í bæjarbrekkunni á Ísafirði en byrjað verður á að hittast í Safnahúsinu til að hitta aðra eða fá aðstoð við að reima á sig búningana.
Skrúðganga leggur af stað frá Silfurtorgi kl. 13.30 en gengið er að íþróttahúsinu á Torfnesi með skáta og lúðrasveit í broddi fylkingar. Hátíðardagskráin fer síðan fram í íþróttahúsinu og hefst hún kl. 14 þar sem Gísli Halldór Halldórsson bæjarstjóri, Gunnar Bragi Sveinsson ráðherra, Lilja Rafney Magnúsdóttir þingmaður og Ólafur Ragnar Grímsson forseti flytja ávörp sín.
Hátíðargestir fá að njóta þess að hlýða á tónlist hátíðarkórs Ísafjarðarbæjar, Dagnýjar Hermannsdóttur og Svanhildar Garðarsdóttur og Sindra Freys Sveinbjörnssonar og að því loknu fer fram afhending nýs þjóðbúnings og loks verður boðið upp kökur og kaffi. Fyrir börnin verða leikir, glens og gaman við íþróttahúsið á milli kl. 16 og 18. Þar verða meðal annars farið í útileiki, hægt að fara í leiktæki, kassaklifur og þá munu trúðurinn Wally og Húlla Dúlla skemmta krökkunum.
Klukkan 16.30 opnar sýning Árna Aðalbjarnasonar í Safnahúsinu og klukkan 21.30 hefst dansleikur á Landsbankaplaninu, eins og árið 1966, en þar munu BG og Árni, Trap og Rythmatik eiga sviðið.
Trúbadúrarnir Dagur og Hjálmar spila á Húsinu frá kl. 23 fram á kl. 03 og þá verður ball með Hirti og Magnúsi Traustasonum í Edinborgarhúsinu sem hefst á miðnætti. Loks er það svo hljómsveitin Trap sem spilar á Krúsinni á sama tíma.
Hlaupahátíð Vestfjarða
Vesturgötuhjólreiðar eða Svalvogahjólreiðar eru keppnisgrein á Hlaupahátíðinni í sjöunda sinn. Hjólað verður frá íþróttahúsinu á Þingeyri kl. 10 og korteri síðar fara átta kílómetra skemmtihjólreiðar af stað. Klukkan 11.30 er Skemmtiskokk á Þingeyri, tveggja og fjögurra kílómetra vegalengdir eru í boði. Þá verður boðið upp á útijóga, vöfflubakstur og fleira skemmtilegt við sundlaugina á Þingeyri.
