Það verður margt um að vera á Þingeyri og nærliggjandi bæjarfélögum þann 17. júní. Dagskráin á Þingeyri hefst með gróðursetningu á Þingeyrarodda kl. 9:30, og því næst er mæting kl. 11:00 við Íþróttahúsið til að taka þátt í víðavangshlaupinu í Dýrafirði. Söngvarakeppni Höfrungs verður svo í Félagsheimilinu kl. 20:00. Að þessu sinni verða tvær æfingar fyrir keppnina; önnur verður í Félagsheimilinu í dag milli 14:00 og 16:00, og hin æfingin verður annað kvöld frá 19:30 - 22:00.

17. júní dagskráin á Hrafnseyri hefst á hádegi, eða kl. 12:00, með athöfn í tilefni útskriftar meistaranema í haf- og strandsvæðastjórnun við Háskólasetur Vestfjarða.
Kl. 14:00 verður Guðsþjónusta þar sem séra Hildur Inga Rúnarsdóttir, sóknarprestur í Þingeyrarprestakalli, predikar og kirkjukór Þingeyrarkirkju syngur.
Kl. 15:00 kynnir Eiríkur Finnur Greipsson, formaður Hrafnseyrarnefndar, hátíðardagskrá en Katrín Jakobsdóttir, mennta- og menningarmálaráðherra flytur hátíðarræðu dagsins og Peter John Buchan, kennari við íslenskudeild Manitobaháskóla, syngur íslensk ættjarðarlög.
Kl. 16:00 verður kaffihlaðborð og Marsibil G. Kristjánsdóttir sýnir málverk sín í Bursabænum.