07.01.2015 - 11:33 | BIB,skutull.is
Þingeyri við Dýrafjörð. Ljósm.: Mats Wibe Lund.
Búið er að auglýsa eftir aðilum sem eru tilbúnir að nýta 400 tonna aflaheimildir á Þingeyri, sem Byggðastofnun úthlutar sem sérstakar viðbótaraflaheimildir til vinnslu á staðnum. 400 tonnin eru hluti af sérstökum byggðakvóta sem ætluð eru byggðarlögum sem standa frammi fyrir alvarlegum og bráðum vanda vegna skorts á aflaheimildum eða óstöðugleika í sjávarútvegi og eru mjög háðar sjávarútvegi og eiga litla möguleika á annarri atvinnuuppbyggingu. Þessi sértæki byggðakvóti á að skapa eða viðhalda sem flestum heilsársstörfum fyrir bæði konur og karla við veiðar, vinnslu og afleidda starfsemi í viðkomandi sjávarbyggðum. Vísir hf. í Grindavík, sem stundaði fiskvinnslu á Þingeyri hættir starfsemi sinni á staðnum á þessu ári og fer í burtu með aflaheimildir sínar frá Þingeyri. Þar hafa verið unnin 2-3.000 tonn á ári.
Umsóknarfrestur er til 21. janúar og við val á samstarfsaðila er byggt á trúverðugum áformum um útgerð og vinnslu sjávarafurða eða aðra starfsemi, fjölda heilsársstarfa fyrir karla og konur, nýtingu þeirra veiðiheimilda sem fyrir eru í byggðarlaginu og öflugri starfsemi til lengra tíma sem dregur sem mest úr óvissu um framtíðina. Einnig skal byggt á jákvæðum áhrifum á önnur fyrirtæki og samfélagið og traustri rekstrarsögu forsvarsmanna umsækjanda.
