Magnús tekur á móti afmælisgjöfinni. Það er Gunnlaugur Gunnlaugsson sem hampar bikarnum fyrir hönd Íþróttafélags eldri borgara á Ísafirði.

Gamli hreppstjórinn Sigurður Þ. Gunnarsson er fastur yfirdómari á afmælismótum Magnúsar.

Ólafía Sigurjónsdóttir og Margrét Guðjónsdóttir sáu um kaffiveitingarnar með glæsibrag að venju. Lengst til vinstri er Valdís Veturliðadóttir keppandi frá Ísafirði.

Allt er þetta elskulegt og heimilislegt. Lengst til hægri er hún Þorbjörg Gunnarsdóttir sem stjórnar öllu innan stokks í Íþróttamiðstöðinni á sinn ljúfa hátt. Næst henni er svo hún Ólafía Sigurjónsdóttir að hagræða tertunum, þá Gaui körfuboltakappi með meiru, þá forstjórinn sjálfur í flotta Navy frakkanum sínum með hattinn. Svo höldum við að það sé sonur hans Gaua sem er lengst til vinstri.

Það var frekar þunnskipað hjá Harmonikukörlunum og Lóu þegar við tókum myndina. En þau eru alltaf tilbúin að spila þegar Magnús kallar. Frá vinstri eru Bergsveinn og Lóa á Mýrum, þá Guðmundur Ingvarsson, póstmeistari sem Magnús kallar Póstarann og svo Sigurður Friðrik útvegsbóndi og framkvæmdastjóri.

Mynd sem skýrir sig sjálf.

Frá verðlaunaafhendingunni. Magnús sjálfur er náttúrlega fremst til vinstri.

« 1 af 7 »

Laugardaginn 21. nóvember 2015, fór fram í Íþróttamiðstöðinni á Þingeyri 65 ára afmælismót Magnúsar Helga Guðmundssonar bocchiakappa. Eru afmælismót hans árlegur viðburður.  Glatt var á hjalla að vanda hjá Magnúsi. Hart var barist í bocchiakeppninni og mátti stundum ekki á milli sjá. Og boltarnir fóru í ýmsar áttir að vanda.

   Það voru víst norðanmenn sem unnu, en Dýrfirðingar stóðu saman sem einn maður, hver í sínu liði eða þannig. Dugði bara ekki til. Stóri bikarinn fór norður og fullt var af verðlaunapeningum sem áður. Harmonikukarlarnir og Lóa spiluðu hjá Magnúsi eins og þau eru vön og vel var borið á borð í kaffinu og kemur ekki á óvart.  

   Við tókum fullt af myndum hjá Magnúsi í dag og fylgja þær hér með. Þeir sem eru með I-padda mega þó búast við að einhverjar þeirra séu á hvolfi. Þá verða menn að snúa tækinu rólega við. Þá kemur myndin rétt. En þetta er hvimleitt tæknilegt vandamál í I-paddanum okkar og reyndar klaufaskapur líka. En þetta stendur allt vonandi til bóta þegar nær dregur jólum.