Gamanmyndin Sterkt kaffi eftir Börk Gunnarsson verður sýnd í Simbahöllinni laugardaginn 2.apríl kl. 20:00. Myndin er 82 mínútur að lengd en hún fjallar um ung pör í Prag sem fara með litlum fyrirvara í ferð á æskuslóðir stúlknanna. Þegar á reynir, komast þau að því að sambönd þeirra eru ef til vill ekki eins traust og þau hefðu haldið. Hér er vissulega ekki um neina unglingamynd að ræða en flest þroskað og vel gefið fólk ætti að skemmta sér vel, segir í tilkynningu. Leikstjóri myndarinnar verður á staðnum og kynnir myndina, auk þess sem hann les upp úr nýrri bók sinni.

 

Á sunnudaginn opnar Simbahöllin kl. 20:00 en hálftíma síðar hefst Vinjettuhátíð á Vestfjörðum. Hátíðin er haldin í samvinnu við heimamenn en þeir taka þátt í upplestri og hljóðfæraslætti, ásamt Ármanni Reynissyni, vinjettuhöfundi og Vestfirðingi að fjórða hluta. Tónlistina annast Guðmundur Ingvarsson, harmonikkuleikari, og tónlistahjónin Krista og Raivo Sildoja sem leika þjóðlagatónlist á fiðlur. Ásamt Ármanni Reynissyni lesa: Gunnhildur Elíasdóttir húsmóðir, Ragnar Guðmundsson harðfiskverkandi, Sr. Hildur Inga Rúnarsdóttir, Gunnlaugur Ólafsson skólastjóri, Davíð Kristjánsson heldriborgari, Skúli Elíasson skipstjóri og nemendur við Grunnskólann: Agnes Sólmundsdóttir og Anton Líni Hreiðarsson. Í miðri dagskrá verður gert hlé fyrir veitingar og spjall, en belgískar vöfflur og fleira verður í boði.

 

Það er vert að taka það fram að barinn verður opinn á laugardagskvöld, og aðgangur er ókeypis á báða viðburðina.