Ísfirski tónlistarmaðurinn Biggibix, eða Birgir Örn Sigurjónsson fagnar útgáfu fyrstu sólóplötu sinnar Set Me On Fire með útgáfutónleikum um Vestfirði ásamt hljómsveit sinni í næstu viku. Um er að ræða stutta tónleikaröð sem hefst með tónleikum í Bragganum á Hólmavík 14. júlí. Daginn eftir verða tónleikar í Sjóræningjahúsinu á Patreksfirði og síðan á Veitingahorninu á Þingeyri 16. júlí. Allir tónleikarnir hefjast kl. 21. Herlegheitunum lýkur síðan með tónleikum í Alþýðuhúsinu á Ísafirði kl. 17, laugardaginn 17. júlí. Forsala aðgöngumiða á tónleikana á Ísafirði er hafin í Hamraborg. Miðinn kostar 1.000 krónur forsölu en 1.500 krónur við hurð.

Biggbix mun flytja lög af frumraun sinni sem kom út í mars en meðal laga af plötu hans má nefna smáskífuna Oh My, Oh My sem notið hefur mikilla vinsælda, Situation og lagið Silverlight en þessi lög eiga það sameiginlegt að hafa náð langt á vinsældarlista Rásar 2.