Bæjarstjóri setur ekki út á efndir Þingeyrarsamkomulags
Gísli Halldór Halldórsson, bæjarstjóri Ísafjarðarbæjar, segir að hann geti ekki sett út á efndir samkomulags Byggðastofnunar og Íslensks sjávarfangs, það sem af er. „Ef frá er skilinn sá tími sem lokað var vegna sumarfrís þá hefur verið botnlaus vinna þarna. Byggðakvóti verður hinsvegar alltaf umdeildur því hann er billeg og ófullkomin lausn til að bæta fyrir samfélagslega ósjálfbært og óréttlátt kvótakerfi.“ segir hann. Undanfarið hefur afla verið keyrt suður eða landað annarsstaðar, en aflinn kemur úr kvóta sem Byggðastofnun lagði til og á samkvæmt samningi að vera unninn á Þingeyri.
Stjórnendur Íslensks sjávarfangs segja að á meðan makríll er frystur á Þingeyri komist ekki annað að og því hefur aflinn verið unninn fyrir sunnan. Gísli Halldór segir það varla geta skipt máli hvort þorski sé skipt út fyrir makríl, aðalatriðið hljóti að vera að á Þingeyri sé haldið uppi fullri vinnu og þar landað sambærilegu aflamagni. „Ef það verður haldið uppi vinnu í allan vetur þá eru þeir búnir að toppa Vísi,“ segir hann en vinna hjá Vísi á Þingeyri gat verið mjög stopul.
