Bolungarvík. Ljósm.: Einar K. Guðfinnsson.

Hannibal Guðmundsson á Hanhóli í Syðridal í Bolungarvík var oft skjótur til svars og komst vel að orði. Börn þeirra Hanhólshjóna voru sextán talsins og þeirra á meðal nokkrar dætur sem voru hver annarri myndarlegri, sannkallaður kvennablómi.

Þegar þessi saga gerðist var Lilja dóttir Hannibals orðin gjafvaxta og farinn að vinna niðri í Bolungarvík þar sem hún leigði sér herbergi. Ólafur Halldórsson, seinna skipstjóri, var þá ungur maður. Hann mætti Hannibal eitt sinn snemma morguns á götu í Bolungarvík.

Óli hugsaði sér að hrella karlinn svolítið og sagði:

Ég sat hjá Lilju dóttur þinni í alla nótt við að spila.

Hannibal lét Óla ekki slá sig út af laginu og svaraði:

Eitthvað hlýtur að vera að hjá þér. Ef þið hafið bara verið að spila skaltu fara til læknis.