A A A
  • 1935 - Vagna Sólveig Vagnsdóttir
01.09.2015 - 06:34 | Morgunblađiđ,BIB

Af Rjómaballinu og Guđna

Margrétr Hauksdóttir og Guđni Ágústsson. Ljósm.: BIB
Margrétr Hauksdóttir og Guđni Ágústsson. Ljósm.: BIB
« 1 af 3 »
Guðni Ágústsson skrifaði mér á sunnudaginn:
„Ég sendi skáldunum orð vegna Rjómaballsins. Skáldin glöddu Eyfirðinga með kveðskap á Handverkshátíðinni, ekki síst um fuglahræðu-þemað. Nú stjórnaði ég Rjómaballinu á Núpi, uppskeruhátíð vestfirskra bænda, í umboði Helgu Guðnýjar Kristjánsdóttur, bónda í Botni. Ég bar saman Rjómann og drulluna á Mýrarboltanum, rjóminn er góður og gleður en drullan er verri og viðbjóðsleg. Rjóminn og skyrið sem menn sletta eru dásamlegar afurðir kýrinnar. Það lífgar upp á mig að fá vísu, sagði ég skáldunum, og vestfirskir bændur gleðjast þegar skáldin yrkja.

Fyrstur er Pétur Pétursson læknir:

 

Grófur mýrarboltabragur

bagar Guðna hugarþel,

en ljótur þingsins leðjuslagur

líkaði honum bara vel.

 

Og Pétur aftur:

 

Að gáska vel ég Guðna þekki

þótt græðgi rugli þankana.

Ég vona að Helga hleypi ekki

honum í mjólkurtankana.

  

Helga Guðný Kristjánsdóttir í Botni svaraði þá Pétri:

 

Karlinn í gáska glettist og hlær,

gaukar að vísum penum.

En drottinn má vita hvort drengurinn nær

dropa úr steingeldum spenum.

 

Enn kom Pétur með vísu:

  

Guðna bíður varla vægð,

vestur á fjörðum er á randi,

og eykur sína fornu frægð

með fíflaskap og rjómablandi.

 

Nú kom Jón Kristjánsson mér til varnar og yrkir í minn orðastað:

  

Ekki skortir hann orðaforðann,

á óhróðrinum stöðugt klifar,

til mín ennþá skammir skrifar

skottulæknirinn að norðan.

  

Og loks orti Halldór Blöndal mér til varnar.

  

Guðni aldrei undan sló,

augnablikið karl nam góma.

Orða-konfekt á hann nóg

– auðvitað með skyri og rjóma!“

 

Þetta er gott bréf frá Guðna og gefur tilefni til að rifja upp limru eftir sr. Hjálmar Jónsson um þau hjónin Guðna og Margréti Hauksdóttur:

  

Guðni er góður um flest,

gæska hans hvarvetna sést,

þótt elski hann kýr

og allskonar dýr

þá elskar hann Margréti mest.

 

Halldór Blöndal

 

Morgunblaðið þriðjudagurinn 1. september 2015.

« September »
S M Ţ M F F L
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30