A A A
  • 1956 - Sigurđur Pétur Jónsson
  • 1962 - Sighvatur Jón Ţórarinsson
12.01.2018 - 22:36 | Hallgrímur Sveinsson

Sundlaugarmenning okkar fyrr og nú

Í Ţingeyrarakademíunni eru mál krufin til mergjar.
Í Ţingeyrarakademíunni eru mál krufin til mergjar.

Dr. Eiríkur Bergmann segir í Smartland á mbl.is að sundlaugarmenning okkar Íslendinga sé framlag okkar til siðmenningar. Sjálfur fer hann helst daglega í sund og saknar Vesturbæjarlaugarinnar mest þegar hann er erlendis, utan vina og ættingja. Eiríkur segir sundlaugarferðir allra meina bót og samfélagið þar oft mjög sérstakt.      Þetta eru orð að sönnu. Spurningin er bara hvort læknar eigi ekki hreinlega að gefa mönnum rezept á sundlaugarferðir til að lækna ýmsa kvilla sem hrjá  okkur í dag, bæði andlega og líkamlega.

 

Í Þingeyrarakademíunni eru mál krufin til mergjar

 

   Í sundlauginni á Þingeyri í Dýrafirði hefur á liðnum árum ekki einungis verið hugsað um líkamlegu hliðina. Hin andlega hliðin kemur þar einnig við sögu. Í mörg ár hefur nefnilega verið lesið þar upp úr vestfirskum bókmenntum og jafnvel heimsbókmenntum. Þar sem margir spekingar koma saman, verður svo auðvitað að stofna akademíu. Þingeyrarakademían starfar af fullum þrótti í heita pottinum og við kaffiborðið hjá henni Þorbjörgu Gunnarsdóttur, sem stjórnar öllu til sjós og lands í Íþróttamiðstöðinni. Þar eru innanlandsmálin og  heimsmálin krufin til mergjar og stundum bara hreinlega leyst!

 

Snorri gekk til laugar

   Og skal nú nefndur til sögu Snorri nokkur Sturluson. Fróðir menn segja að hann hafi gengið  til laugar upp á hvern dag er hann var í Reykholti. Sumir telja að þar hafi hann sagt skrifurum sínum fyrir hluta af ódauðlegum bókmenntum sínum. Þeir hafi verið á laugarbakkanum og mundað þar fjaðurpenna sína, heimatilbúið blek og kálfsskinn. Og þeir voru fleiri sem gengu til laugar fyrstu aldir Íslandsbyggðar: Grettir Ásmundarson, Egill Skallagrímsson, Guðrún Ósvífursdóttir, Kjartan Ólafsson. Vituð ér enn eða hvat? Í þá daga voru menn alltaf annaðhvort í laug eða á leið til laugar eða baða.

 

 

Snorralaug er frægust laug á Íslandi

   Fyrsta laug sem getið er um á landinu er einmitt Snorralaug í Reykholti. Hún er frægust laug á Íslandi vegna aldurs og gerðar. Eignuð Snorra Sturlusyni sem sagnir herma að hafi látið gera laugina í þeirri mynd sem hún er nú, fyrir nærri 800 árum. Svo segir Jón Þorsteinsson heitinn læknir í Læknablaðinu 07. 08. 2005.

  Sagan segir að Snorra hafi þótt gott að sitja í lauginni. Og þar hafa örugglega ýmis ráð verið ráðin, svo voldugur og fyrirferðarmikill sem Snorri var í landsmálum þeirra tíma. "Þat var eitt kveld, er Snorri sat í laugu, at talat var um höfðingja. Sögðu menn at þá var engi höfðingi slíkur sem Snorri ". "Sturla Bárðarson hafði haldið vörð yfir lauginni, ok leiddi hann Snorra heim". Þá hefur Snorri verið haltur. Ári seinna var hann á Alþingi. "Snorri tók ámusótt um þingit ok mátti hann ekki ganga.“  (Sturlunga). Hann hefur líklega haft þvagsýrugigt segir læknirinn. Snorri var veisluglaður höfðingi sem hélt dýrlegar veislur og "jóladrykki eftir norrænum sið." Og hann var kvennamaður mikill.  

Hallgrímur Sveinsson.


« Janúar »
S M Ţ M F F L
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      
Jón Sigurðsson í hnotskurn

Veistu, hvílíkt afrek það var að halda úti Nýjum félagsritum í 30 ár?


Veistu, hvernig alls konar fyrirgreiðslustörf hlóðust á Jón?


Veistu, hvernig hann leysti þau af hendi og hvern þátt þau áttu í vinsældum hans með þjóðinni?


Veistu, hvenær Jón þurfti mest á fjárhagsstuðningi að halda heiman frá Íslandi?


Veistu hvernig Íslendingar og Danir brugðust þá við?

Eldri spurningar & svör