Þetta glæsilega skemmtiferðaskip frá Hurtigfarten í Noregi lagðist að bryggju á Þingeyri 6. sept. 2016. Sjaldan verið stærri sem þar hafa lagst að kaja. Egill (Stebbi) sýnist ekki stór við hliðina hinumegin. En nú er hún Snorrabúð stekkur! Ljósm. H. S.

1. Vestfirsku Alparnir. Nú er hringleiðin orðin opin um þetta magnaða landslag. Búið að fara á fjörurnar undir Skútabjörgum og öðrum björgum og framhjá álfabyggðinni Stapa. Seigur er Gunnsi! Og Valdimar í Græði, þegar hann er með honum.

2. Rokk. Það er ekkert að frétta úr blokkinni. Þó segja þeir að það hafi verið rokk um alla blokk daginn fyrir fyrradag!

3. Kaffibollinn. Sums staðar er einn bolli af molasopa seldur á 800 kall að sagt er. Vonandi samt ekki hér fyrir vestan! Einn Bónus kaffipakki kostar 398,- kr. Hann ætti að fara létt með að duga í 50 - 75 bolla með ábót! Hvað kallast þetta?

4. Inniskórnir. Kaffibollinn minnir á hina sanngjörnu leigu á inniskóm í Bláa Lóninu, 1400 kall parið fyrir eina sundferð! Skór sem kosta kannski 500 kr. í Rúmfatalagernum. Var einhver að tala um græðgi?

5. Auðkúluhreppur. Nú er allt að komast á full sving í Auðkúluhreppi. Gamla hreppsnefndin liggur undir feldi og íhugar hvort hún eigi að lýsa hreppinn sjálfstæðan á ný.

6. Hýbýlaprýði. Flogið hefur fyrir að veita eigi Þingeyringum verðlaun fyrir hýbýlaprýði. En það er Fegrunarfélag Vestfjarða sem veitir slíkar viðurkenningar, líkt og Fegrunarfélagið í Reykjavík. Staðurinn er ofboðslega flottur, utan- sem innandyra segir ungdómurinn. Og það er satt!

7. Skipshöfnin. Nú er Dúddi búinn að ganga til hreppstjórans og munstra skipshöfnina á m/b Dýrfirðing. Er hún óbreytt með svokallaða þríbura innanborðs. Grímur léttadrengur á Eyrinni verður loggskipstjóri, reðarinn verður sjálfur fiskiskipstjóri, Bjarni Georg yfirmaskínumeistari og fjölmiðlafulltrúi og Póstarinn verður yfirbryti og fulltrúi útgerðarinnar útávið. Hann er að vísu nýkominn af sjúkrahúsi. En það breytir engu. Hann mun kasta frá sér hækjunum, líkt og góði dátinn Svejk, um leið og reðarinn kemur og bankar á gluggann og segir ræs! Menn eru ekkert að tvínóna við hlutina þegar alvaran birtist. Þetta er svipuð aðferð og Pétur Hansson notaði þegar hann ræsti út mannskapinn fyrir Lobba forðum daga. Eins og elstu menn muna!