A A A
  • 1935 - Soffía Einarsdóttir
16.04.2015 - 06:57 | Hallgrímur Sveinsson

Hættið að kenna galeiðuþrælunum um!

Merkir umbúðir fyrir skreið. Lilja Guðmundsdóttir, fiskvinnslukona á Flateyri í rúma hálfa öld. Ljósm.: BIB
Merkir umbúðir fyrir skreið. Lilja Guðmundsdóttir, fiskvinnslukona á Flateyri í rúma hálfa öld. Ljósm.: BIB

Nú er stóra tækifærið Grandamenn!    

Önnur grein.


„Það er klikkun að ég sem forstjóri sé svo miklu meira virði en venjulegur starfsmaður.“ Þetta sagði bandarískur forstjóri með ofurlaun, í vikunni eftir að hann lækkaði eigin laun geysilega mikið til að geta hækkað laun annarra starfsmanna í fyrirtækinu. (Heimild: Pressan)

   Sérfræðingar í fiskvinnslu hjá stórfyrirtæki hér á  landi fá íspinna í launahækkun þegar vel gengur. Sem er svo lurkur þegar að er gáð. Þetta fólk, menntað í skóla lífsins, hefur skilað gífurlegum verðmætum til þjóðarbúsins í beinhörðum gjaldeyri. Hefur reynslu á við margra ára háskólanám. Það ætti að fá laun samkvæmt því. Sumir segja að það gangi ekki. Þjóðfélagið muni sporðreisast! Fiskvinnslukonan vinnur 173 stunda þrældómsvinnu á mánuði fyrir sultarlaun. 250 þúsund kall á mánuði! Þetta er eins og dropi í milljarðahaf arðgreifanna! Stjórn HBGranda er ekki öfundsverð þessa dagana. Annað hvort ættu þeir að segja snarlega af sér eða breyta sinni launapólitík og arðgreiðslum. Laða fiskvinnslukonurnar að sér! Ef þeir hefðu vit á því mundi margt breytast. Nú er tækifærið Grandamenn!

   Það er þjóðarnauðsyn að þeir sem lepja dauðann úr skel fái sinn sanngjarna hlut af þjóðarkökunni. Þó fyrr hefði verið. Fer þá ekki allt til andskotans? Verðbólgan á flug! Við segjum nei. Þeir sem hafa allt til alls verða nú að hugsa sinn gang. Hætta að kenna galeiðuþrælunum um. Svo einfalt er það.

   Og meðal annarra orða:
Hvenær ætli það verði talið eftirsóknarvert að vinna í fiski á Íslandi? Svarið er borðleggjandi: Þegar Grandamenn og aðrir arðgreifar lagfæra launakjörin. En hvar á að taka peningana? 

 

Hallhgrímur Sveinsson.

« Mars »
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31