Álftamýrarkirkja á vesturslóð í Arnarfirði. Álftamýrarkirkja var reist árið 1896 úr timbri. Hún skemmdist í ofviðri snemma á árinu 1966 og var tekin ofan skömmu síðar. Svo segir í Kjartansbók. Hún var fallegt og stílhreint hús, þó ekki væri hún stór. Myndin er úr fórum Níelsar Ársælssonar frá Tálknafirði.

10. Harmonikukarlarnir og frúrnar á Mýrum æfa nú og æfa skart. Það hlýtur að standa eitthvað mikið til í vor. Guðmundur Ingvarsson, yfirlautinant og dírigent, ber fulla ábyrgð á því máli ásamt Sigurði Friðrik Jónssyni, útvegsbónda og framkvæmdastjóra rekstrarsviðs. Þetta er víst stærsta harmonikuhljómsveit norðan Alpafjalla segja þeir.

11. Vestfirska forlagið er hætt að gefa út bækur sem kunnugt er. Samt eru Vestfirskar sagnir 4. hefti að koma út eftir páska. Og fleiri í farvatninu. Þetta er náttúrlega bilun!

12. Umferðin. Mikil umferð hefur verið um Vesturleið undanfarna daga. Alls konar bílar og allt niður í vanbúna bílaleigubíla. Hrafnseyrarheiðin er 552 mtr. yfir sjávarmáli. Þar er við ýmsu að búast. En einhvern veginn virðist það samt allt blessast sem betur fer.

13. Sina. Allt er nú vaðandi í sinu í Arnarfirði. Sama hvert litið er. En lítið sem ekkert er farið að grænka ofan í sinunni á Hrafnseyrarhlíð eins og oft er nú um þetta leyti. Aðeins hálf grænir stubbar frá því í fyrra sjáanlegir. Ekkert farið að grænka í Hrafnseyrarbökkunum.

14. Grænn varstu dalur. Sama er að segja um túnin í Mýrahreppi og í Arnarfirði, þau sem séð verða frá borginni Þingeyri. Það er eiður að nokkurn grænan fölva sjái á þeim. Kannski bara eitthvað smá eins og konurnar segja. Svona er þetta. Og krummi er orpinn að vanda 9 nóttum fyrir sumarmál.

15. Harpað efni. Vegurinn frá Ölsteini, ofarlega á Hrafnseyrardal og langleiðina inn í Mjólka er flottur núna yfirferðar. Og hvers vegna‘? Vegna þess að það var borið nokkuð ofan í veginn um þetta leyti í fyrra. Harpað efni heitir það víst og slitlag þegar það er komið á veginn.

16. Og blessuð lóan er komin!