Einn góður úr Súgandafirði
Hjólbörurnar
Þorleifur Guðfinnur Guðnason, Leifi Nogg, einn af sjö svonefndum Botnsbræðrum í Súgandafirði, hefur meðal annars verið þekktur fyrir skemmtileg tilsvör, ekki síst vegna þess að þau sýna góða greind og skynjun á hinum skemmtilegri hliðum mannlífsins. Ekki verður heldur séð að Leifi hafi litið upp til manna og enn síður að hann líti niður á samferðamenn sína.
Eitt sinn var Leifi Nogg við útskipun á freðfiski á Suðureyri og vann niðri í lest. Yfirmenn á þessum skipum vildu eðlilega hafa sem mestan hraða á verkinu og vildu ekki sjá neinar tafir. Í þetta skipti voru tveir vörubílar að flytja fiskinn niður að skipi og töfðust þeir báðir vegna bilana. Stóð þá ekki á aðfinnslum skipsmanna í garð heimamanna. Spurðu þeir með þjósti hvort ekki væru þá til hjólbörur í þessari andskotans krummaskuð og útnára. Leifi varð fyrir svörum og svaraði með hæversku:
Jú, þær eru til.
Þá var spurt með sömu raust hvers vegna í helvítinu þær væru þá ekki notaðar.
Og með sömu hægðinni kom svarið:
Þær eru bilaðar.
(99 vestfirskar þjóðsögur, Vestfirska forlagið)
