Alþjóðlegur sumarskóli um matvælaframleiðslu og loftslagsmál á Þingeyri í september
Sumarskóli um matvælaframleiðslu og loftslagsmál verður haldinn í Blábankanum á Þingeyri nú í september á vegum samtakanna Future Food Institute í samvinnu við FAO, matvæla- og landbúnaðarstofnun Sameinuðu þjóðanna. Þrír slíkir skólar fara fram í ár. Sá fyrsti var haldinn í New York undir yfirskriftinni borgir, annar var haldinn fyrir skemmstu í Tókíó með þemað sveitir og hafa Vestfirðir á Íslandi verið valdir sem staðsetning fyrir þriðja skólann, sem mun fjalla um hafið. Skólinn fer fram í Blábankanum á Þingeyri 1. – 7. september næstkomandi en þar er von á frumkvöðlum og áhrifafólki á sviði matvælaframleiðslu og loftslagsmála alls staðar að úr heiminum.
Sameiginlegt markmið skólanna er að finna áþreifanlegar aðferðir og nýjungar til að vinna gegn loftslagsbreytingum.
Future Food sumarskólarnir um loftslagsmál beina sjónum að mikilvægustu sviðum nýsköpunar og öðrum leiðum til þess að vinna gegn loftslagsbreytingum. Skólarnir leiða saman hreyfivalda allstaðar að úr heiminum úr ólíkum áttum til þess að marka saman áþreifanlegar stefnur og móta nýjungar til þess að hraða aðgerðum í loftslagsmálum og vinna að sjálfbærnimarkmiðum.
Íslendingum gefst kostur á að sækja um þátttöku í skólanum sem haldinn verður á Þingeyri sér að kostnaðarlausu, utan kostnað við gistingu og ferðalög. Einnig er áhugasömum boðið að taka þátt í opinni vinnustofu sem haldin verður 5. september þar sem unnið er að raunhæfum lausnum í loftslagsmálum. Hægt er að skrá sig til þátttöku með því að senda inn umsókn í sumarskólan og/eða vinnustofuna með því að senda tölvupóst.
