Stórfjölskyldan í Svalvogum árið 1942. Aftari röð frá vinstri: Hreiðar Hálfdanarson, Ottó Þorvaldsson, Magnea Símonardóttir, Ásdís Þorvaldsdóttir, Þorvaldur Jón Kristjánsson, Sólborg Matthíasdóttir, Kristín Guðmundsdóttir (móðir Magneu), Elinborg Ása Guðbjarnadóttir. Fremri röð frá vinstri: Steinberg Þórarinsson, Þorvaldur Ottósson, Ingibjörg Ottósdóttir, Helga Ottósdóttir, Sigurrós Ottósdóttir, Kristján Ottósson, Anna Ottósdóttir, Ingibjartur Jónsson, Halldóra Ottósdóttir og Hallí (á vegum Sigurðar ljósmyndara). Myndina tók Sigurður Guðmundsson, ljósmyndari

     Það var siðvenja að halda jólatrésskemmtun einhverntíma eftir áramótin í Keldudal í skólahúsinu þar. Á þá skemmtun komu þeir sem vettlingi gátu valdið, þar á meðal fólk utan af nesi, frá Höfn og Svalvogum. Ottó í Svalvogum átti þá nokkuð af smákrökkum og kom inneftir með telpurnar sínar. Þegar skemmtunin var úti, var lagt af stað úteftir. Þá hafði nú spillst eitthvað færðin, kominn svona snjóvaðandi.

   Við Valdimar Þórarinsson tókum það að okkur að fylgja honum. Þá fannst okkur það nú fyrirhafnarminna að bera krakkana í strigapoka á bakinu og það var gert og lánaðist ágætlega. Sú sem ég bar að mig minnir, var Helga, nú frú í Reykjavík. Þetta er til marks um það hvað lagt var á sig til að komast á jólatrésskemmtanirnar í Keldudal, en frá Svalvogum í Hraun er um það bil eins og hálfs klukkutíma gangur í góðu gangfæri. Yfirleitt var gengið í fjöru að vetrinum.    

(Mannlíf og saga fyrir vestan 7. hefti)