Línurit yfir vikulega framvindu

Í viku 23 voru grafnir 86,9 m í göngunum og því lengd ganganna í lok vikunnar 2.557,9 m en það er 48,3 % af heildarlengd ganganna. Í vikunni var þunnt lag af kargabasalti að færast upp eftir sniðinu og var það komið upp í þekjuna í lok vikunnar. Það kom fyrir að bergið væri ekki að springa nægjanlega vel og þar af leiðandi grófust sumar færurnar ekki í fulla dýpt. Breytingar voru gerðar á borholumunstrinu og magni sprengiefnis til að reyna að ná betri sprengingum. Efninu úr göngunum hefur ýmist verið keyrt beint í fláafleyg á vegkaflanum frá munna og niður að Hófsá eða haugsett á vinnslusvæði við Hófsá.

Unnið hefur verið við að búa til vinnuplan við Mjólká þar sem gert er ráð fyrir að reka niður steinsteypta staura fyrir nýju brúna yfir Mjólká. Við Hófsá var unnið við lagningu vegar að fyrirhugaðri bráðabirgðabrú og gert klárt fyrir undirstöður brúarinnar.

Áfram var unnið við sprengivinnu í forskeringunni í Dýrafirði.    

Hitanemum hefur verið komið fyrir bergi á 1 m og  5 m dýpi í öllum úskotum. Berghiti hefur verið að hækka hægt og rólega eftir því sem komið hefur verið lengra inn í göngin þar til nú þegar berghiti í útskoti F mældist 18,7°C sem er 0,4°C minni hiti en mældist í síðasta útskoti.