Heita laugin á Dynjanda
Leyndardómar Vestfjarða:
Á hjallanum ofan við gamla bæjarstæðið á Dynjanda í Arnarfirði er upphlaðin, þríhyrnd laug, sem fáir vita um. Er laugin skemmtilegt mannvirki sem kemur á óvart.
Þorvaldur Thoroddsen mældi hitann í lauginni 26. júlí 1887 (Ferðabókin) og reyndist hann þá vera 26,5 gráður á Celsíus.
Hinn 19. september 1996 reyndist laugarhitinn vera 27,3 gráður. Svo mældu þeir vinirnir Sófus Guðmundsson og Elís Kjaran sem nú dvelja á æðri lendum. Þess skal getið til gamans, að hitinn í sundlauginni á Þingeyri er oftast 29 gráður á Celsíus.
Ekki er vitað nákvæmlega hvernig laugin var notuð, en sumir segja að þar hafi þvottur verið þveginn og kannski hafa heimasæturnar á Dynjanda baðað sig í henni áður og fyrr.
(Mannlíf og saga 3. hefti) Vestfirska forlagið
