Frá stórframkvæmdunum í Mosdal: - Verið að bera ofan í veginn um Urðarhlíð
Vegurinn um Urðarhlíð, milli Dynjanda og Óss, opnaðist 1957.
Fyrsti maðurinn til að aka hann var Bjarni G. Einarsson á Þingeyri á sínum einkabíl. Var það rétt fyrir miðjan september það ár. Þá var hann að fara heim með húsfreyjuna á Ósi, Þuríði Jónsdóttur, og nýfædda dóttur hennar og Péturs Sigurðssonar, hana Guðmundu, sem er yngst systranna frá Ósi.
Þessi vegur hefur nú ekki verið hátt skrifaður í gegnum tíðina. En það var mikið átak að leggja hann á sínum tíma líkt og var um aðra vegi sem frumherjarnir lögðu hér um slóðir. Vegurinn hefur verið urð og grjót eins og nafn hlíðarinnar bendir til. En nú bregður svo undarlega við að Valdimar í Græði í Önundarfirði er að leggja síðustu hönd á að bera ofan í Urðarhlíðarveg. Aðeins á eftir að bera fínt slitlag á veginn.
Þorbjörn bóndi á Ósi fræðir okkur á því að þetta hafi ekki skeð síðan afmælisárið mikla 1974. Bjössi man öll ártöl. Er þetta í eina skiptið í þá rúmlega hálfu öld sem vegurinn hefur staðið að hann hefur fengið einhverja búningsbót sem hægt er að kalla því nafni. Eru þá undanskilin örfá bílhlöss.
Meðf. myndir H.S. sýna framförina.
